– கே. பி. பத்மநாபன்

கோழி கூவும் நேரத்தில்

     குடிசை வீட்டில் எழுந்திடுவான்;

மேழி தன்னை எடுத்திடுவான்;

     மேட்டு வரப்பில் நடந்திடுவான்;

ஆழி சூழ்ந்த உலகினிலே

     அனைத்து மாந்தர் பசியாற

நாழி உணவைப் பெறுதற்காய்

     நன்றாய் நிலத்தை உழுதிடுவான்;

தாழி தன்னில் கொண்டு வந்த

     தண்ணீர் மோரும் கலந்திட்ட

கூழினையே குடித்திடுவான்;

      கொதிக்கும் வெயிலில் உழைத்திடுவான்;

கீழிருக்கும் ஆழ்மண்ணைக்

     கீழ் மேலாக ஆக்கிடுவான்;

பூழிச்சேற்றில் காலூன்றிப்

     பொழுதும் நன்றாய் உழைத்திடுவான்;

ஏழு நாள்கள் வாரத்தில்;

     எல்லா நாளும் உழைத்திடுவான்;

வாழும் உயிர்தம் பசியாற்றும்

     வள்ளல் அவனை வாழ்த்திடுவோம்!

பாழில்லாமல் பண்படுத்திப்

     பயிரைக் காக்கும் உழவனையே

வாழி வாழி என்றே நாம்      வாழ்த்திப் போற்றி வணங்குவோமே!