பிறரை வென்று வாழ்வதற்காய்ப்

                பித்தலாட்டம் செய்வதுவும்

உறவை எல்லாம் மிதிப்பதுவும்

                உண்மை தன்னை மறைப்பதுவும்

திறமையாக ஏய்ப்பதுவும்

                திருடிப் பொருளைச் சேர்ப்பதுவும்

புறமே கூறி நடப்பதுவும்

                புகழைத் தருமென்(று) எண்ணாதே!

அறமே இல்லாச் செய்கைகளால்

                ஆதிநாளில் கிடைப்பதெலாம்

இறவாப் புகழென்றாகாதே;

                ஈசல் வாழ்வே அதற்குண்டு:

மறந்தும் கேடு செய்யாமல்

                மனிதநேயத் தொண்டுடனே

சிறந்த செயலைச் செய்வோர்க்கே

                சீரும் பேரும் நிலைத்திருக்கும்!

நிறமும் இனமும் மதமுமெலாம்

                நேர்மையற்ற பேதங்கள்;

பிறரையும் தன் உடன்பிறப்பாய்ப்

                பேணி அணைத்தல் வாழ்நீதி;

நறவாம் இந்நல் வாழ்வினையே

                நரகல் ஆக்கல் கீழ்ச்செயலே;

அறத்தோ டென்றும் வாழ்தல் தான்                

அழியாப் புகழை உனக்கீயும்!

– கே. பி. பத்மநாபன்