எப்போதும் எதிலும்

ஒழுங்கைக் கடைபிடிக்கும்

பக்கத்து வீட்டுக்காரருக்கு

காணும் எல்லாவற்றிலும்

நீளும் தாமதம்

காணச் சகிக்காமல்

தலைக்கேறும் கோபத்தில்

தானாகவே கிடைத்து விடுகிறது

சிடுமூஞ்சிப் பட்டம்

தேவையின் உச்சத்தில்

காலைப் பிடித்தும்

காயை நகர்த்தியும்

காரியம் சாதித்துவிடும்

எதிர் வீட்டுக்காரருக்கு

சாமர்த்தியசாலிப் பட்டம்

பொருந்திப் போகிறது.

எப்போதும் உதவியென

யார் கேட்டாலும்

ஓடிச்செய்யும்

மாடி வீட்டு நண்பருக்கு

எளிதில் கிடைக்கிறது

இளிச்சவாயன் பட்டம்

எப்படி வாழ்வதென்ற கேள்வியோடும்

எதைப் படிப்பதென்ற

ஏக்கத்தோடும்

எனைச் சுற்றியுள்ளோரைக் கண்டு

மனிதர்களின் மனிதத்தைப் பார்க்காமல்

பட்டங்களில் புறம் பேசும்

உலகத்தைப் பார்க்கையில் வந்துவிடுகிறது பேரச்சம்.

இளையவன் சிவா